Elkarguneko igerileku itxietarako ez da aurrez ordurik hartu beharko hemendik aurrera. Abuztuaren 22an zabalduko ditu ateak Elkarguneak, urtero bezala, bi astez itxita egon ostean. Irekitzen denerako, erreserba sistema kenduta izango da.
Pandemiak eragindako murrizketen ondorioz, igerilekua erabiltzeko aurrez ordua hartu beharra zegoen orain arte. Erreserba sistemarekin jarraitu ala ez erabakitzeko bazkideen artean galdetegia egin berri da, eta gehiengoa malgutasunaren alde agertu da. Beraz, Udalak erreserbak bertan behera uztea erabaki du.
Guztira 234 bazkidek erantzun dute galdetegia, baina 25 baliogabekoak izan dira. Kontuan hartzekoak, beraz, 209 erantzun izan dira guztira. Haietatik 69 dira erreserba sistemarekin jarraitzearen aldekoak, eta 140, kontrakoak, alegia, erreserbarik gabeko erabilera nahiago dutenak.
Udalak jasotako erantzunen arabera hartuko zuela erabakia iragarri zuen, eta horrela egin du.
