Javier Zubizarreta alkatea Hezkuntza sailburu Jokin Bildarratzekin elkartu da herriko ikastetxeen eta irakaskuntzaren inguruko gaiak jorratzeko asmoz.
Azkoitian bertan bildu dira, alkateak hala eskatuta, eta horrela, Gaztanenea Formazio Zentroa bisitatzeko aukera aprobetxatu dute, eta bertan kokatzen diren Hizkuntza Eskolaren gela desplazatuak ikusi dituzte.
Alkateak bidelagun izan ditu Ana Azkoitia eta Marijose Arregi zinegotziak eta Hezkuntza sailburuari zenbait hobekuntza egiteko beharra helarazi die, herriko eskolek egindako eskaerekin batera.
Besteak beste, mahaigaineratutako gaien artean daude Gaztanenean igogailu bat jartzearen beharra irisgarritasuna hobetzeko, edota eskolek eskatzen duten patioen eraldaketa burutzeko aukerak.
"Bilera ondo joan da, eta hainbat puntu izan ditugu hizpide. Ikusiko dugu ea Hezkuntza sailak lagun gaitzakeen Azkoitiko eskolei erantzuna emateko. Oraingoz, ez dugu ezezkorik jaso", dio Javier Zubizarreta alkateak.
