Bazkarirako txartelak erosteko azken eguna maiatzaren 20a izango da
Azkoitiko herriak trikitia zainetan darama, eta horren erakusle izango da maiatzaren 27rako antolatu den II. Trikiti Egune. Iaz ekimenak izan zuen arrakasta ikusita, antolatzaileek ez dute aurten zalantzarik izan. Beste behin, trikitilari zaharren eta gazteen, eta trikiti ikasleen eta irakasleen bilgune izango da Azkoitia.
Triki Girok eta Udalak antolatu dute II. Trikiti Egune, Azkoittiko Tabernaixek taldearen laguntzarekin. Egitarauari dagokionez, iaz bezala San Martinen elkartuko dira trikitilariak 11:30ean, eta herrian kalez kale ibiliko dira. 13:30ean, kalejira handia egingo dute Julio Urkixo etorbidetik Herriko plazara, eta behin plazan, argazki erraldoia aterako dute.
Bazkaria Herriko plazan izango da 15:00etan, eta bazkarirako txartelak salgai daude Dean, Koxka eta Latz tabernetan. Txartelak erosteko azken eguna maiatzaren 20a izango da.
Bazkarirako txartelak 25 eurotan daude salgai helduentzat. 15 urtez azpikoentzat, berriz, 15 eurotan jarri dituzte.
Bazkalostean, 18:00etatik 22:00etara bitartean, erromeria izango da nagusi. Trikitilariek gogoz astinduko dituzte soinu eta panderoak.
