Baserri munduaren beharra bisibilizatzeko eta aldarrikatzeko, eta bertako produktuak sustatzeko sortu zen Herri Jaia ospatuko da igande honetan Azkoitian. Txahal errearen pintxoez eta bertako ekoizleen produktuez gozatzeko aukera paregabea izango dute Herriko plazara hurbiltzen direnek.
Ohi bezala, Ikurriñaren plazan erreko dute txahala, eta eguerdiko 12:00etatik aurrera, txahal eta sagardo dastaketa egiteko aukera izango da. Petritegi, Zapiain, Añota eta Ekain sagardo ekoizleek hartuko dute parte eta haiek egindako sagardoa eskainiko da.
Baserritarrek ere punta-puntako eta garaiko produktuak izango dituzte salgai. Zazpi baserritar edo ekoizlek jarriko dituzte postuak plazan, bertako jakien kalitatea eta eskaintza aurkeztuz.
Eguraldiak laguntzen badu, Goiko Losan puzgarriak ere jarriko dira haurren gozamenerako.
Ohi bezala, txahal pintxoez gozatzeko txartelak erosi beharko dira aurrez, plazan bertan horretarako egokitutako gunean. Edalontziak ere eskuragarri egongo dira bertan.
