Pasiraren ezaugarrietako bat da mugitzeko zailtasun handienak dituzten pertsonek ibilbidea egin dezaketela Izarraitz Lanbide Heziketako ikasle diren eta Mendekotasun Egoeran dauden Pertsonen Arreta gradua egiten ari diren begiraleek lagunduta. Parte hartzen dute, halaber, Osasun Publikoak, Mugimentek, Mugi Azkoitiak, Plaza Ondo Jubilatuen Elkarteak, Azkoitia Lagunkoiak, Gurutze Gorriak eta Caritasek. Eragileek parte hartzera eta esperientzia probatzera animatzen dituzte herritarrak.
Ekimenak pertsonen ongizate fisikoa eta psikologikoa bilatzen du. Jarduera fisikoa egiteaz gain, gure ongizate emozional eta sozialean funtsezko zeregina duten harreman pertsonalak sustatu nahi ditu Pasirak. Horregatik, aldian-aldian, paseatzeaz gain, bestelako ekintzekin ere gozatzen dute, hala nola, herriko toki interesgarriren bat bisitatuz edota kafea hartuz.
