K-baret antzerki musikaleko kideek kontzertu akustikoa eskainiko dute larunbat honetan, urtarrilaren 4an. Hitzordua arratsaldeko 18:00etan izango da Elkarguneko areto nagusian. Sarrera doan da.
Guztira sei lagunek partekatuko dute oholtza kontzertuan. Maite Alberdi, Eneritz Aulestia, Jone Larrañaga, Aitor Leon, Andrea Pozo eta Nora Unanue izango dira protagonista. Hainbat abesti joko dituzte zuzenean. Euren hitzetan, “emanaldi goxoa, gertukoa eta berezia” izango da.
Bigoterik Gabea Antzerki Taldearen proiektua da K-baret. Taldeak 10 urte beteko ditu 2020an eta horren harira, hainbat ekintza antolatzeko asmoa erakutsi dute.
“Antzerki taldeak sorreratik helburu izan du herritarren artean antzerkiarekiko eta kulturarekiko grina eta afizioa sustatzea eta aurten ere horretan saiatuko gara”, diote.
Asmo horien bueltan, egun hauetan gaztetxoentzat antzerki eta dantza klaseak emango dituzte Elkargunean, gazteak antzerki mundura gerturatzeko “eta kultur sortzaile izateko gaitasunak garatzeko” xedez.
