Egoera normalean Udala Andramaixetako egitaraua ixten eta urteroko prestaketa lanetan buru belarri ibiliko litzateke egun hauetan. Aurten, ordea, ez da halakorik gertatuko. Udalak erabaki du Andramaixek bertan behera uztea, guztion osasunari lehentasuna emanez.
Alderdi guztietako udal ordezkariak behin betiko erabakia hartu aurretik herriko elkarteekin bildu ziren haien iritzia ezagutzeko eta elkarrekin adosteko zer egin. Egungo testuingurua ikusita, ez da zalantzarik egon.
Udalaren eta Um Blem Ble Tabernarien Elkartearen bilera
Aisialdiarekin lotuta hainbat udalerritan izandako agerraldien aurrean, Udalak Um Blem Ble Tabernarien Elkartearekin bilera egin du egoerari nola aurre egin aztertzeko, aisialdiarekin loturiko covid 19aren agerraldiak prebenitzeko ahal den neurrian. Aste honetan berriro bilduko dira alde biak.
