Berriak
Bai Euskarari zozketako bi saridunek astelehenera arte dute saria jasotzeko epea
Bai Euskarari Ziurtagiridun saltokietan egindako zozketako hiru saridunetatik bakarra agertu da, oraingoz. 2282 zenbakidun txartela Axen Alberdi "Aiztarri"k zuen, eta jaso du 200 euroko erosketa txartela. Beste biak, ordea agertzeko daude: 0002 zenbakia, Aldalur gizonezkoen jantzien dendan saldutakoa eta 2010, Dean tabernan saldutakoa. Bi txartel horien jabeek astelehenera arte dute saria jasotzeko epea; agertu ezean, ordezkoak sarituko dira: 2186, FK kopistegian saldutakoa, eta 2090, Dean tabernan saldutakoa.
Indarkeria matxistari ez
Bilboko hilketa eta erasoak salatzeko elkarretaratzea egin zuten atzo herriko plazan Azkoitiko Emakumeen Mahaiak deituta. Herritar zein ordezkari politikoak batu ziren 'Indarkeria matxistari aurre hartu!' lemapean.
Bilboko hilketak salatzeko, elkarretaratzea gaur (asteartea), plazan
Bilboko hilketak salatzeko elkarretaratzea deitu du gaurko (asteartea) Azkoitiko Emakumeen Mahaiak. 19:00etan izango da kontzentrazioa, herriko plazan. Udalak ere bat egiten du deialdiarekin eta bertaratzera deitzen ditu herritarrak.
Hondakinen tratamenduaren kostu ekonomikoez arituko dira asteazkenean
Hondakinen lan taldearen laugarren saioa asteazkenean izango da. Oraingoan, Azkoitiko Hondakinen Kudeaketaren inguruko datu ekonomikoak aztertuko dituzte, eta horrekin batera, eskualdean atez ateko sistema ezartzeko bideragarritasun tekniko ekonomikoaz ere arituko dira. Hizlariak honakoak izango dira: Ana Ruiz, Azkoitiko Udaleko kontuhartzailea, eta Garbitania enpresako kide bat. Saioa, 18:30ean izango da, Elkargunean, eta herritar guztiak bertaratzera gonbidatzen ditu Udalak.
Zurrumurruak kudeatzeko estrategia komunikatiboak eta emozionalak aztergai, asteartean
Asteartean (ekainak 4) Zurrumurruen aurkako 3. tailerraegingo da. Zurrumurruak kudeatzeko estrategia komunikatiboak eta emozionalak landuko dira, Rafa Crespo Uberoren eskutik (Xarxa Antirumors, Bartzelonako elkarteko kidea).Bi partetan banatuko da saioa: batetik zurrumurruen birusak nola eragiten digun aztertuko dute, eta gero, zurrumurru horiei erantzuteko ekiteko tresnak landuko dira. Saila 18:00etan izango da, Elkargunean.
Udaltzaingoak artzain txakurkume bat jaso du
Iragan maiatzaren 22an artzain txakurkume bat topatu zuen Udaltzaingoak eta jasota dauka. Jabeari Udaltzaingoarekin harremanetan jartzeko eskatzen zaio, udaletxera agertuta edo 943 85 71 71 telefonora deituta.
Ekobailara proiektua garatzeko sei lagun kontratatu dira Enplegu Planaren barruan
Urola Erdiko enplegu planaren barruan aurkeztutako Ekobailara proiektua ari da, pixkanaka-pixkanaka, garatzen. Horretarako sei lagun kontratatu dira (hiru bailarako bost udalen laguntzaz), Lanbideren bidez, eta dagoeneko ari da bakoitza bere alorra lantzen: turismoa, konposta, nekazarien produktuak merkaturatzea... Kontratazioak sei hilabetekoak izango dira. Bestalde, enplegu planaren barruan antolatu diren formazio ikastaroak ere martxan daude eta 45 lagun ari dira parte hartzen hiru ikastoretan. Azkenik, AtaBe ekintzailetasun eta autoenplegu proiektua martxan jartzeko aurreneko gestioak ere egin dira.
Enplegu planaren barruan, bailarako egoera sozioekonomikoen datuak ere aztertzen dituzte eta dagoeneko egin dute apirileko txostena. Hemen duzue eskuragai.
Tiritatxoren eskutik jaso dituzte harpidetzak
Irriz eta pozez bete zen Udal pleno aretoa iragan asteazken arratsaldean. Pirritx eta Porrotxen klubeko 'Irria' aldizkarien harpidetzan zozketako sariak banatu zituen eta Tiritatxo etorri zen sariak banatzera. Muxuz eta besarkadaz, gustura baino gusturako jaso zituzten aldizkaria, posterrak eta pultserak irabazleek. Hemen dituzue ekitaldiko argazkiak.