Alkateak gorazarre eta eskertza hitzak izan ditu Sahatsarentzat. "Eskuzabaltasunik gabe ez dago herriarentzat dantza egiterik. Ezta herriarekiko maitasunik gabe ere. Zuen eskuzabaltasuna, maitasuna, 1976tik eskainitako denbora, eta oholtzetara eta plazetara eramandako ikuskizunak eskertu nahi ditugu gaur. Dantza ez delako bakarrik dantza. Dantza askoz gehiago delako, zuek bezala, bihotza jartzen zaionean. Bihotza eta sormena". Bizitza luzea opa dio alkateak Sahatsari.
Aitortza ekitaldia egun Sahatsa osatzen duten kideen eta, modu batera edo bestera, Sahatsaren historiaren eta ibilbidearen zati diren beste askoren arteko topagune bihurtu da. Familia argazkia egin ostean, Udalak ohorezko aurreskuarekin egin die harrera Sahatsako kideei. Une gorena sari banaketarekin heldu da.
Juan Luis Lizabek jaso du oroigarria alkatearen eskutik eta Pello Larrañagak hartu du hitza elkartearen izenean. Esker oneko agertu da. "Gaur egun kide diren eta kide izan diren guztiek taldearekiko izan duten konpromisoagatik iritsi gara gaur gauden lekura". "Ez dugu -jarraitu du- uste beste edonork baino gehiago ez gutxiago merezi dugunik. Sari hau Azkoitiko norbanako edo taldean aritzen diren kultura eragile guztiekin partekatu nahiko genuke, arrakastatsuak izan edo ez".
Sahatsako kide eta kide ohiez gain, gaur protagonista izan da, halaber, udaleko Kultura teknikaria den Jesus Arrizabalaga. Aipamen berezia jaso du "urte luzez herri honetako kultura sustatzearen alde lan egin duelako, herriko elkarteen eta herritarren ondoan egon delako beti, ezkutuko lana izan delako berea, argazkirik gabekoa. Aldiz, oso gertukoa". Kultura Saria emateko, parte-hartze prozesu bat garatu ostean, batzordea osatu zen eta Arrizabalaga batzorde horren ekimenez omendu da.
Ekitaldiari itxiera emateko Sahatzako dantzariek emanaldi labur bat eskaini dute. Ekitaldian parte hartu dute, halaber, bai aurreskua dantzatzen eta bai pianoa jotzen, Bizkargi Musika eta Dantza Eskolako ikasleek. Sahatsaren historia laburbiltzen duen eta Josu Odriozolak egin duen bideoa ere ikusi ahal izan da ekitaldian.
