Udalak joan den astean gertatutako adin txikiko neska baten kontrako erasoa irmoki salatu du, Azkoitiko herriak ez duelako inoiz onartuko emakumeen aurkako inolako bortizkeriarik. Udalak babesa helarazi dio biktimari, eta dituen baliabideak bere eskura jarri ditu.
Gaur eguerdian Udaleko Bozeramaile Batzordea bilduta egon da, egoera aztertzeko. Izan ere, biktima adin txikikoa izanik, Udalaren lehen ardura da biktima ez birbiktimizatzea, eta bere zein gurasoen borondatea errespetatzea egoera salatzeko antola daitezkeen ekintzen aurrean.
Udalak biktimaren eta hurbilekoen intimitatea eta konfidentzialtasuna bermatu behar ditu, nahitaez. Horregatik, adierazpen edo agerraldi publikoak egin aurretik, biktimaren onespena eskatzen du, eta adin txikikoen kasuan, gurasoena.
Ondorioz, eta familiarekin egon ostean, Udalak bat egingo du erasoa salatzeko antola daitezkeen ekintzekin.
Biktimak salaketa jarria du, eta Ertzaintza ikerketa lanetan ari da.
