Elizondok eta Kultura zinegotzi Sonia Vazquezek aurkeztu dute egitaraua bidelagun dituztela Loiolako Basilikako organista Itziar Urbieta eta Azpeitiko eta Bergarako kultura teknikariak.
Azkoitian kontzertuak Parrokian izango dira hilaren 3an, 10ean, 17an eta 24an. Arratsaldeko 20.00etan izango dira eta sarrera doan da.
Larunbat honetan, hilaren 3an, Ana Belén García organistak, Easo Emakumeen Abesbatzak eta Easo Kapera Gregorianistak emango dute kontzertua. Elizondoren arabera, “une bikainean dago Easo Abesbatza. Aurten Donostiako Hamabostaldian eman dute kontzertua hirurek eta polita izango da”.
Bigarren kontzertua urriaren 10ean izango da eta Óscar Candendo Donostiako Artzain Onaren Katedraleko organista titularra izango da protagonista, Ana Otxoa sopranoarekin batera.
Przemyslay Kapitula organista poloniar ezaguna Azkoitian izango da urriaren 17an eta 24an Azpeitiko eta Bergarako Musika Eskoletako organo ikasleek itxiko dute zikloa.
Kontzertu gehiago Bergaran eta Azkoitian
Azkoitirako prestatutako proposamenez gain, aurtengo organo zikloak beste sei hitzordu eskainiko ditu Bergarako Santa Marina Parrokian eta Loiolako Basilikan. Euskal musikariek hartuko dute parte. Asteburu honetan, Bergaran Aitor Olea organistak oholtza partekatuko du Bergarako Musika Eskolako Haurren Abesbatzarekin. Eta igandean, hilaren 4an, Esteban Elizondo berak emango du kontzertua Loiolan.
Bergarako egitaraua beste bi kontzerturekin osatuko da. Mikel Ansola organistak eta Akelarre abesbatzak emango dute horietako bat eta bestea, Óscar Candendo organistak eta Ana Otxoa sopranoak. Azken bikote honek itxiko du aurtengo Bergarako edizioa.
Azpeitian, Itziar Urbietak eta Loreto Fernández Imazek bi eta lau eskutara emango dute kontzertua. “Formato dibertigarria”, Urbietaren hitzetan. “César Francken obrak interpretatuko ditugu eta oso aproposak dira Cavaillé Coll baterako. Urtebete egon gara kontzertua prestatzen eta oso ondo pasa dugu biok”.
Azpeitiko kontzertuei amaiera Ignacio Arakistain organistak, Jon Aramendi tronpeta-joleak eta Mariatxen Urkia sopranoak emango die.
