Berriak
Mintzakideek herriko zuhaitz eta landareak ezagutzeko txangoa egin dute
Mintzalagunek hasi du ikasturtea. Larunbatean elkartu ziren mintzakideak eta orduan egin zuten aurreneko ekintza: 10:00etan batu ziren Kontzejupean, Agurtzane Epelde euskara zinegotziak eta Izaro Larrañaga AEKko kideak Mintzalagun programari buruzko azalpenak eman zituzten, eta horren ondotik, Ruben Sudupe biologoarekin ibilaldia egin zuten Ubaiar auzora, herriko landare eta zuhaixkak ezagutzeko.
Termiaten aurkako zerbitzuaren nondik norakoak azaltzeko bilera irekia egingo da asteartean
Azkoitiko Udalak eskaintzen duen termiten aurkako zerbitzuaren nondik norakoak azaltzeko bilera bat egingo da bihar (asteartea). Bilera 12:30ean izango da, udaletxeko pleno aretoan. Zerbitzuaren nondik norakoak azaltzeaz gain, orain arte eman dituen emaitzak ere aztertuko dituzte bilera horretan. Bilera irekia izango da.
Mintzalagunek bihar ekingo dio ikasturte berriari
Bihar, larunbata, azaroak 10, mintzalagun programaren 2012-2013 ikasturteko hasiera ekitaldia egingo da Azkoitian.10:00etan hasiko da ekimena: Mintzalaguneko kide guztiak Kontzejupean bilduko dira eta bertan mintzataldeak ezagutzera eman eta gero, 10:15 inguruan, ibilalditxoa egingo dute Ubaiar auzora, Ruben Sudupe biologoaren gidaritzapean. Ibilaldian ikusiko dituzten zuhaitz, zuhaixka eta bestelako espezien inguruko azalpenak emango ditu Sudupek txangoan zehar.Amaitzeko, ibilaldiaren ostean mokadutxoa egingo dute, 12:00etan, Elkarguneko sukaldean.
Danon Herrixe prozesuko tailera egingo da bihar (larunbata) goizean
Danon Herrixe partaidetza prozesuaren lehen fasea amaitzeko, tailer bat egingo da bihar goizean (larunbata). Tailer horretan orain arteko bileretan azkoitiarrek euren auzoaren, arloaren eta herriaren inguruan egindako diagnostikoa azalduko da aurrena, eta horren ondotik, hobetzeko dauden kontu horiek hobetzeko proposamen zehatzak jasoko dira. Tailerra dinamikoa izango da, taldeka lan egitekoa, eta tartean hamaiketako bat ere izango da. 09:30etik 13:00era egingo da tailerra, Elkargunean.
Edukiontzi batean butano bonbonak azaldu izana salatu dute Udalak eta Mankomunitateak
Orain egun batzuk gasez bestetako zazpi butano bonbona agertu ziren Aingeru kaleko atzeko edukiontzi batean eta Urola Erdiko Mankomunitateak eta Azkoitiko Udalak gogor salatu nahi dute gertaera hori. Butano bonbonak nahiz bestelako gai arriskutsuak Garbigunean jasotzen direla gogora arazi nahi dute eta ohiko edukiontzietan uztea oso arriskutsua dela ohartarazi.
San Jose egoitzak gaur (asteartea) ekingo dio Adinduen asteari
Txokolatada bero batekin eta Floreaga ikastetxekoen bisitarekin hasiko dute gaur (asteartea) Adinduen astea San Jose egoitzan. Bihar, seiko urre txapelketa izango dute, etzi Xabier Munibe ikastolakoen bisita, eta ostiralean txokolatada eta bingoa. Asteburuan izango dira, halere, ekintza potoloenak.
Azkoitia Lantzenen patrimonioa eguneratzea eta bideragarritasun plana egitea gomendatu du auditoriak
Gaur arratsaldean Azkoitia Lantzenen 2011ko kontuak aurkeztuko ditu bertako lehendakari eta udaleko alkate Pello Bastarrikak kontseiluaren aurrean. Auditoria bidez egiten dira kontuak eta auditoria horrek enpresa publikoaren egoera ekonomiko, patrimoniala eta finantzarioa aztertzen ditu, eta horren ondoren egoeraren inguruko txosten bat egiten du. Azkoitia Lantzenen 2011ko kontuen txostenak "kezkatzeko arrazoiak" eman ditu, Bastarrikaren hitzetan. Auditoriak berak ere enpresa publikoaren patrimonioa berriz baloratzea ezinbestekoa dela esan du eta egoera zaila aurreikusita bideragarritasun plan bat egitea gomendatu du.
Mintzalagunek euskaldun zaharrak behar ditu arratsaldeetarako
Euskara dela zure ama hizkuntza? Euskara maite duzula? Euskararen alde zerbait egin nahi duzula? Arratsaldeetan ordubete libre izatea nahikoa duzu horretarako. Mintzalagunen parte hartzera animatu nahi zaitugu: astean behin, 16:00etatik 17:00etara ordubetez elkartu eta euskaldun berriekin euskaraz hitz egitea da egin beharreko bakarra.Bi euskaldun berri eta euskaldu zahar batek osatutako taldetxo txikietan, euskaraz hitz egin eta ondo pasatzea da helburua. Euskarari bultzada emateaz gain, euskaldun berriei ere lagunduko diezu euren ikasketa prozesuan eta euskara entzungo den guneak irabazteko aukera ere sortuko da.
Orain duzu aukera. Izan Mintzalagun.
Izena emateko edo informazio gehiago eskuratzeko: 943 151 089, 943 857 170, Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko. edo Helbide elektroniko hau spam roboten kontra babestuta dago. JavaScript aktibatuta eduki behar duzu hau ikusteko..