Berriak
Anaitasuna Espainiako Txapeldun izan zeneko argazki erakusketa, 50. urteurrenean
Ospakizun eguna da biharkoa Anaitasuna Futbol Taldearentzat. 50 urte dira Afizionatuen Espainiako Kopa Txapelketa irabazi zuela, eta balentria hura oroituko dute bihar. Meza egingo dute eta lagunarteko bazkaria, ondoren. Lorpena gogora ekartzeko, Portaleburu Eraskusketa Aretoan erakusketa antolatu dute eta ikusgai egongo da gaurtik igandera bitartean, ondorengo ordutegian:
Udalak Katulagun elkartearekin hitzarmena sinatu du katuen koloniak kontrolatzeko
Udalak eta Katulagun elkarteak elkarlanerako hitzarmena sinatu dute katuen koloniak kontrolatzeko eta kudeatzeko. Kaleko katuen kontrola Udalaren eskumenekoa da, eta legez egin beharrekoa. Horregatik, egokia ikusi du Katulagunekin akordioa ixtea kaleko kolonien kontrol programa aurrera eramateko.
Katuak abandonatu eta kontrolik gabe abandonatzen direnean sortzen dira koloniak. Horrek higiene arazoak eta gaixotasunen transmisio arriskua areagotzen ditu, besteak beste. Arrisku horiek gutxitzeko edota saihesteko CES (harrapaketa, esterilizazioa eta askatzea) metodoa aplikatuko da. Metodo horrek animalien ongizatearen eta elkarbizitzaren arteko oreka bermatzea du helburu.
Tenis saio magistrala Txerloian, Garbiñe Muguruza tenislariaren eskutik
Ostiral honetan, uztailaren 7an, Garbiñe Muguruzak Txerloia Tenis Pistak bisitatuko ditu, eta bertako haur eta gaztetxoekin tenis saio bat egitera ere animatuko da. Ana Azkoitia alkateak egingo dio harrera Roland Garrosen eta Wimbledonen txapeldun izandako tenislari ezagunari, eta bidelagun izango ditu tenis klubeko ordekariak, ikasleak eta kideak.
Hitzordua 17:00etan izango da Txerloia Tenis Pistetan. Ongietorri eman ostean, tenislariak bertaratzen diren haur eta gaztetxoekin tenisean jolastuko du bere ezagutzak erakutsiz. Aurreikusitako jardueren artean daude jolasak, galderentzat tartetxoa eta oparien zozketa. Ordu eta erdi iraungo du Muguruzaren bisitak gutxi gorabehera.
Gaitasun digitalak garatzeko kanpaina ibiltaria
Generación D herritarren gaitasun digitalak garatzeko beharraren inguruan sentsibilizatzeko eta kontzientzia hartzeko kanpaina ibiltaria da. “Únete a la Generación D” lelopean, herritarren artean eten digitala murrizteko xedez, autobus bat herriz herri dabil trebetasun digitalak hobetzeko doako prestakuntza pertsonalizatua eskainiz.
Espainiako gobernuak sustatzen duen Generación D proiektuaren autobusak Azkoitia bisitatuko du aste honetan.
Ez ohiko Udal Bilkura.
Hurrengo astelehenean, goizeko 09:00etan, egingo da ez ohiko Udal Osoko bilkura, uztailaren 23ko Hauteskunde Orokorretako mahaikideak izango direnen zozketa egiteko.
Hiri eta Landa Ondasun Higiezinen gaineko zergak
Ekainaren 30era arte, borondatezko epean ordaindu ahal izango dira 2023ko ekitaldiko ordainagiriak, Hiri Ondasun Higiezinen gaineko Zergari eta Landa Ondasun Higiezinen gaineko Zergari dagozkienak.
Helbideratu ez diren erreziboak posta arruntaz bidali dira, jadanik ez baduzu jaso Azkoitiko Udalaren Harrera Bulegoan eskatu beharko duzu. Borondatezko epea, errezibo hauek ordaintzeko, ekainaren 30ean amaitzen da
Udalak atzo Bilbon gertatu zen emakumearen hilketa irmoki gaitzetsi du
Udalak bere gaitzespenik irmoena adierazi du atzo Bilboko Santutxu auzoan gertatu zen 89 urteko emakumearen erahilketaren aurrean. Halaber elkartasuna adierazten die senideei eta biktimen hurbilekoei, eta antolatzen diren gaitzezpen ekitaldi edo elkarretaratzeetan parte hartzera animatzen ditu herritarrak.
Udalak emakumeen aurkako bidegabekeria eta eskubide urratze guztiak errotik desagerrarazteko lanean jarraituko du.
"Azkoittiko hike poltsikun" liburuxka, jada eskura
Udaleko Euskara sailak eta Hike eizan! egitasmoaren lan-taldeak Xabier Eizagirrek ondu duen "Azkoittiko hike poltsikun" liburuxka aurkeztu dute gaur goizean. Eskuliburuan hitanoa zuzen erabiltzeko azalpenak eta oharrak jaso dira, eta baita aditz-taulak ere. Marijose Arregi jarduneko Euskara zinegotzia bidelagun duela, lanketari buruzko zertzeladak eman ditu Eizagirrek. "Orain eskura jarri dugu gida, jendeak poltsikoan, aldean eraman dezan, eta erabili, erabili hike mingainean".