Berriak
Ur hornidura eta saneamendu sareak berritzen ari dira Aizkibel kalean
Gipuzkoako Urak, ur azpiegituren etengabeko hobekuntza bermatzeko Udalarekin duen akordioaren baitan, Aizkibel kaleko ur hornidura eta saneamendu sareak berritzen ari da.
Hoditeria zaharrak berritzeaz gain, euri urak eta ur fekalak bereiztea ahalbidetuko duen sarea jarriko da. Ur hornidurarentzat 172 metroko luzera duen burdinurtu nodularreko hoditeria jarriko da, eta 185 metroko hoditeria berria saneamendurako. Argiteriaren kanalizazioetan ere hobekuntzak egingo dira.
Eskolako Agenda 2030: Ikasleek energiaren gaia eraman dute udalbatzara
Eskolako Agenda 2030 egitasmoaren baitan, aurtengo ikasturtean Azkoitiko ikasleek energiaren gaia landu dute, eta gaur udalbatzan aurkeztu dituzte energia-kontsumoa murrizteko hartutako konpromisoak eta Udalari luzatutako proposamenak. Javier Zubizarreta alkateak hartu ditu gazteak, haien galderei eta iradokizunei erantzuteko. "Guztiok sinesten badugu ingurumenaren alde lan egin dezakegula, eta horretarako borondatea jartzen badugu, aurrera egingo dugu. "Energia, bizitzaren motorra" leloa aukeratu duzue, eta energiarekiko dugun mendekotasuna. Guztiz bat nator. Horren aurrean, neurriak hartzea eta buelta ematea, guztion esku dago", esan die alkateak. Halaber, lan itzela egin dutelako zoriondu ere egin ditu.
"Maskulinitateak, erantzunkidetasuna eta zaintza-lanak" hitzaldia, Gizonduz egitasmoaren bueltan
Datorren asteartean, maiatzaren 30ean, "Maskulinitateak, erantzunkidetasuna eta zaintza-lanak" hitzaldia eskainiko da Elkargunean, Udaleko Berdintasun arloak eta Emakunde-Emakumearen Euskal Erakundeak antolatuta. Gizonduz proiektuaren idazkaritza teknikoko arduraduna den Karlos García Zuazok emango du hitzaldia. 18:30ean izango da.
Hauteskunde mahaietan, kokaleku aldaketak
Datorren igandean, maiatzaren 28an, udal eta foru hauteskundeak izango dira eta hainbat aldaketa egin da hauteskunde mahaietan.
Azkoitian lau hauteskunde mahai jarriko dira: Xabier Munibe Ikastolan, Elkargunean, Portaleburu Eraskusketa Aretoan, eta Gaztanenea Jauregian.
Bi bozketa gune aldatu dira. Orain arte, Aizkibel Liburutegian bozkatzen zutenek, Gaztanenea Jauregian bozkatu beharko dute. Eta lehen, Torrezuri erakusketa aretoan bozkatzen zutenek, datorren igandean, ondoan dagoen Portaleburu areto berrian bozkatu beharko dute, Herriko plazan.
8.481 lagun daude bozka ematera deituak Azkoitian.
"Sorginak eta Sorginkeriak" ikuskizunarekin agurtuko da aurtengo Udaberriko Musikaldia
"Sorginak eta Sorginkeriak" ikuskizunarekin agurtuko da 31. Udaberriko Musikaldia larunbatean, maiatzaren 27an. Toti Martinez de Lezea idazleak, Gorka Hermosa konpositore eta akordeoilariak, eta Edurne Zabalo klarinetistak partekatuko dute Santa Kutz komentuko eszenatokia. Hitzordua 18:30ean izango da, eta ohi bezala, ordu erdi lehenago aterako da autobusa Julio Urkixo 7ko geralekutik, joan-etorria autobusean egin nahi dutenentzat.
Musika eta dantza, Xabier Munibe Ikastolaren 50. urteurrena ospatzeko
Musika eta dantza jabetu dira Gurea pilotalekuaz Xabier Munibe Ikastolaren 50. urteurren ospakizunean. Xabier Munibe Ikastolaren historia txikia hara! ikuskizunak goraino bete du frontoia. Ia 500 lagunek hartu dute parte emanaldian. Asko eta asko dira ikastolan hazi eta hezi direnak, eta urteurrenak oroitzapenak astintzeko balio izan du. Une hunkigarriak eskaini ditu ikuskizunak. Urte guzti hauetan ikastolaren alde lan egin dutenengatik.
Ibaiaren tindaketa ez da kaltegarria, enpresa batek entseguetan erabilitako fluoreszeinak eragin du
Ibaiaren koloreak eragindako inpaktu bisualaren aurrean, Udalak jakinarazi du tindaketak ez duela kalterik, toxikoa ez delako, eta inertea delako. Kolore berdea Altuna y Uria enpresa Cie Automotive konpainiarentzat exekutatzen ari den obretan egiten ari zen entsegu batzuek eragin dute.
Ibaiak berde kolorea hartu du, enpresak proba batzuk egiteko fluoreszeina sodikoa bota duelako. Substantziak berde kolorea sortzen du, koloratzailea ez-toxikoa izan arren. Ez du inolako ingurumen-inpakturik. Ihesak detektatzeko eta jariakorren joan-etorriak ikusteko erabiltzen den substantzia da. Kasu honetan, obra barruko euri-uren norabidea ezagutzeko bota dute fluoreszeina.
Zaintzaren inguruko hizketaldia antolatu du Azkoitia Lagunkoiak
Zaintzaren harira hizketan izenburupean, zaintza izango dute hizpide Udalak eta Azkoitia Lagunkoiak elkarlanean antolatuta, maiatzaren 23an, asteartean, Elkargunean izango den saioan. 18:30ean izango da hitzordua.
Parte hartuko dute Deustuko Unibertsitateko irakaslea eta Zaintzaren hariak liburuaren egilea den Felix Arrietak, Juan Ramon Alberdi eta Xabier Euzkitze herritarrek eta Hurkoa Fundazioko Hauskor programaren koordinatzailea den Bakarne Etxeberriak. Azkoitia Lagunkoiako kide den Txema Urrutia arituko da moderatzaile lanetan.