Berriak
Apirilaren 26ko udal osoaren ohiko bilkurako gai zerrenda
1.- Aurreko bilkurako aktaren onespena, hala badagokio.
2.- San Jose Egoitza Erakunde Autonomoa desegitearen onespena.
3.- Kreditu gehigarri bidez kredituak aldatzeko Azkoitiko udaleko 2 zenbakidun espedientearen hasierako onespena.
Datorren astean hasiko dira Julio Urkixoko eta Trenbidearen Zumardiako asfaltatze lanak
Eguraldiak ez badu oztopatzen, datorren astean hasiko dira Julio Urkixoko eta Trenbidearen Zumardiako asfaltatze lanak. Julio Urkixo 20tik Etxe-Zuriko zubia pasatu arteko zatia asfaltatuko da batetik, eta Aizkibel Udal Liburutegitik Geltoki tabernara doan bide-zatia bestetik, alegia, Trenbidearen Zumardia 1 eta 13 zenbakien arteko tartea. Madariagako eta Otzolarreko baserri bideetan ere burutuko dira lanak.
Udalak Asfaltos Urretxu S.L. enpresari esleitu dizkio lanak, eta 229.531,14 euroko aurrekontua dute.
Jose Luis Larrañagari omenaldia, xakeko Guinnes errekorraren 40. urteurrenaren harira
Larunbat honetan, apirilaren 22an, 10:30ean Elkargunean, Jose Luis Larrañaga Aldalur (Azkoitia, 1960) omenduko da aldibereko xake-saio batean gehien jokatutako partidengatik Guinness munduko errekorra lortu zuela 40. urteurrena bete dela-eta. Omenaldiaz gain, "Larrako ganbitoa" izenburupean, hitzaldia eskainiko du. Errekorra barrutik nola bizi izan zuen ekarriko du gogora, orduko urduritasunak, ziurgabetasuna, nekea, kezka...
Dantzarien Udaberri Kalejira egingo da datorren igandean
Txalkor Txistulari Taldea eta Bizkargi Musika eta Dantza Eskolako ikasleak kalera aterako dira datorren igandean, apirilaren 23an, herriko txokoak girotzeko. Dantza eta musika izango dira protagonistak. Orain arte, ekimena Dantzari Txiki Eguna bezala ezagutzen zen, baina antolatzaileek Dantzarien Udaberri Kalejira izenarekin aurkeztu dute aurtengo edizioa. Horra egitaraua:
11:30 Julio Urkixo etorbidean dantzari eta musikarien bilkura.
11:45 Balda plazara kalejiran.
12:00 Balda plazan dantza saioa.
12:30 Plaza Baldatik Inazio Iriarte Margolaria kalera kalejira.
13:00 Herriko plazan dantza erakustaldia.
Eguraldiak lagunduko ez balu, Azoka plazan izango litzateke dantza saioa.
Haur danborradako jantziak udaletxean entregatzeko deia egin du Udalak
Joan zen larunbatean ospatu zen Umeen Danborrada, Umore Ona elkarteak, Tata elkarteak eta Udalak elkarlanean antolatuta. Kultura sailak haurrek danborradan erabilitako jantziak udaletxera bueltatzeko deia egin du. Jantziak udaletxe sarreran dagoen kaxan utzi beharko dira, poltsa batean sartuta, eta poltsan haurraren izen-abizenak ipinita.
Jantziak bueltatzeko azken eguna apirilaren 28a izango da. Udaletxean utzi ahalko dira arropak astelehenetik ostiralera 7:30etik 15:30era bitartean.
Edukiontzi berriak jartzen ari dira herri osoan, ekologikoagoak eta irisgarriak
Udala, Urola Erdiko Mankomunitatearen eskutik, herriko edukiontzi guztiak berritzen ari da, herriko txukuntasuna eta guztionak diren espazio publikoak zaintzeko. Ontzi berriak ekologikoagoak, estetikoki modernoagoak, eta batez ere, irisgarriak dira.
Aurreko edukiontziak zaharkituak zeuden. 13 urte dira jarri zirela, eta organikoarenak izan ezik, besteak berdin mantentzen ziren. Hori horrela, Udalak edukiontzi flota guztia aldatzeko eskatu zion Urola Erdiko Mankomunitateari, eta horretan ari dira egun hauetan.
Gaurtik zabalik II. Hike eizan! Bertsopaper Lehiaketan lanak aurkezteko epea
Azkoitiko Udalak, Euskara sailaren eskutik, II. Hike eizan! Bertsopaper Lehiaketa abiatu du. Gaur zabaldu da lanak aurkezteko epea eta maiatzaren 17an itxiko da.
Iaz bezala, sariak hiru kategoriatan banatuko dira. Gazteen kategoria edo 18 urte artekoa, helduen kategoria edo 18 urtetik gorakoa, eta Azkoitia Saria. Bertso sorta onena idatzi duen herritarrak jasoko du Azkoitia Saria, gazteen zein helduen arloan.
Piztu Herrixe! Erosketa Bonuak salgai daude jada Interneten
Piztu Herrixe! lelopean, gaur jarri dira salgai Erosketa Bonuak Interneten. Gaurtik apirilaren 21era bitartean, eskuragarri egongo dira ondorengo loturan: www.azkoitia.eus/bonoak Aurrez aurre erosi nahi dituenak apirilaren 24an, datorren astelehenean, izango du aukera Kontzejupean, 10:00etatik 13:00era, eta 17:00etatik 19:00etara. Erosleak 30€-ren truke 60€ izango ditu eroketetarako, 10 euroko 6 txartel jasoko baititu sektore ezberdinetan trukatzeko.
Nola erabili bonuak
Aurreko kanpainetan bezala, Udaleko Merkataritza sailak eta Herrixen elkarteak bonu kanpaina sektore guztietara zabaldu nahi izan dute, erosketak sektore bakar edo gutxitan kontzentratzea saihesteko. Arrazoi hori tarteko, bonu bakoitza sei sektore edo saltokitan erabili ahalko da, bakoitzean 10 euroko balioa duen bonua trukatuta. Kanpainan parte hartzen duten establezimenduetan kartel bat agertuko da bezeroak jakin dezan zein den bertan erabili daitekeen bonua.
Guztira 666 erosketa bonu jarriko dira salgai. 200 Interneten eta 466 aurrez aurre banatuko dira.