Berriak
Udalak San Juan futbol zelaiko belar artifiziala berrituko du
Udalak San Juan futbol-zelaiko instalazioak hobetzeko proiektua abiatu du. Jarduera nagusia belar artifiziala berritzea izango da, beste jarduera batzuekin batera.
Lanak gauzatzeko, Udaleko Kontratazio Mahaiak esleipen-proposamena egin du, eta haren arabera, Equipamientos y Pavimentos Deportivos Innova Sport SL enpresa izango da esleipenduna. Obren lizitazioa 359.964,24 euroko oinarrizko aurrekontuarekin atera zen, eta Innova Sport S.L.-k aurkeztutako proposamen ekonomikoa 358.212,63 eurokoa da BEZ barne.
Bihartik aurrera herritarrek udalaren webgunean jakin ahalko dute hauteskunde mahaian egon behar duten ala ez
Bihartik aurrera, herritarrek Azkoitiko Udalaren webgunearen bidez jakin ahalko dute maiatzaren 28an hauteskunde mahaian egotea tokatu zaien ala ez. Bihar goizean zehar ahalbidetuko da kontsulta egiteko aukera. Zozketaren emaitza ikusteko, nahikoa izango da www.azkoitia.eus atarian sartu, dagokion atalean klikatu, eta NAN zenbakia sartzea. Sistemak erantzungo du ea mahaian egotea tokatu zaion ala ez. Erantzuna baiezkoa bada, hauteskunde mahaiaren inguruko informazioa ere emango dio erabiltzaileari.
Lau kontzertu eskainiko dira maiatzean Santa Kutzen, Udaberriko Musikaldiaren baitan
Udaberriko Musikaldiaren 31. edizioa indartsu dator. Santa Kutz komentuan lau kontzertu izango dira maiatzean, bat larunbatero. Antolatzaileen arabera, edizio berezia izango da, bi pertsonaia handi oroituko direlako: Jorge Oteiza (1908-2003) eta Juan de Anchieta (1462-1523). Musika zikloak eskultorea eta musikaria ekarriko ditu gogora, haien heriotzen 20. eta 500. urteurrenetan, hurrenez hurren.
Bere ibilbideari 2003an ekin zion Kup Taldeak irekiko du Udaberriko Musikaldia larunbat honetan, maiatzaren 6an. Gabriel Baltesen zuzendaritzapean, taldeak "barrokotik klasizismorako bidea" egitea proposatzen du, Johann Christoph Bachen obrekin. Taldeak Alize Mendizabal organista eta Alejandro Martinez biolontxelista izango ditu bidelagun.
Gaur amaituko dituzte Julio Urkixoko asfaltatze lanak
Gaur bertan amaituko dituzte Julio Urkixoko asfaltatze lanak, eta datorren asteartean hasiko dira Aizkibel Udal Liburutegitik Geltoki tabernara doan bide-zatia asfaltatzen. Bigarren tarte horretan pare bat egunetan bukatuko dituzte lanak, eta jarraian bi eremuetan pintaketa lanak egingo dira.
Egun hauetan Julio Urkixo 20tik Etxe-Zuriko zubira arteko zatia asfaltatzen aritu dira eta datorren astean, bigarren bide-zatiari ekingo diote, Trenbidearen Zumardia 1 eta 13 zenbakien arteko tarteari, hain zuzen. Madariagako eta Otzolarreko baserri bideetan ere burutuko dira lanak. Udalak Asfaltos Urretxu S.L. enpresari esleitu zizkion lanak, eta 229.531,14 euroko aurrekontua dute.
Asteburuko Duatloi Festak eragina izango du garraio publikoaren zerbitzuan eta trafikoan
Asteburuan ospatuko den Duatloi Festak eragina izango du trafikoan eta garraio publikoaren zerbitzuan.
Herri barruko garraioari, Urbanoari dagokionez, ondorengo aldaketak izango dira:
-Apirilaren 29an, larunbatean, arratsaldeko Urbanuen zerbitzua 17:00etan hasiko da Aizkibel Liburutegitik.
-Apirilaren 30ean, igandean, Urbanuek ez du zerbitzurik emango.
Bestalde, Lurraldebus zerbitzuari dagokionez:
Gaur arratsaldean txupinazoarekin hasiko dira Floreaga auzoko festak
Gaur arratsaldean, 19:00etan, txupinazoarekin hasiko dira Floreaga auzoko festak. Auzotarrek ekintzaz jositako hiru egun bete-bete dituzte aurretik. Mus txapelketa, bolo eta eskoba txapelketak, buruhandiak, erromeria, DJa, patata tortilla lehiaketa, puzgarriak... eta Gurutzetxoko XXXIX Krossa, besteak beste. Festa giroa ziurtatuta dago, eta bertaratzen direnek izango dute zertaz gozatu.
Hitzaldia eta Egurbide errotara bisita antolatu dira II. Gipuzkoako Erroten Eguna ospatzeko
Gipuzkoako Erroten Egunaren II. edizioa martxan da, Udalaren eta Urola Bizirik Natur Taldearen eskutik. Bi ekintza antolatu dira. Maiatzaren 10ean, Yurrita Errota Sustatzeko Elkarteko kide Alex Rotetak hitzaldia emango du 19:00etan, Elkargunean. Azkoitiko erroten inguruan arituko da hizlaria.
Halaber, maiatzaren 14an, Egurbide errotara bisita egiteko aukera eskainiko da. Bisita 10:00etan, 11:00etan edo 12:00etan egin ahal izango da.
Bi egun hartuko ditu aurtengo Azkoitiko Duatloi Festak
Probek trafikoan eragina izango dute
Larunbatean eta igandean ospatuko da aurtengo Azkoitiko Duatloi Festa, Azkoitri Triatloi Klubaren eskutik. Hilaren 29an II. Duatloi Txikia izango da goizez, eta VIII. Duatloi Supersprinta, arratsaldez. Hurrengo egunean, igande goizean, berriz, XX. Duatloi Estandarra. Gaur aurkeztu dute ekimena antolatzaileek eta azaldu dutenez, jada Supersprinterako 54 lagunek eman dute izena, eta Duatloi Estandarrerako, beste 178 partaidek. Duatloi txikian aterako diren umeez gain, beste bi probetan 193 gizonek eta 39 emakumek hartuko dute parte guztira.