Berriak
Udalak Azkoitiko herriaren hiri-gutunaren 700. urteurrenaren inguruko bilera irekia deitu du astelehenerako
Azkoitiko herriak hiri-gutuna jaso zuela 700 urte beteko dira 2024an, Alfonso XI.aren garaian eman baizitzaion. Urteurrenaren harira, Udalak batzorde bat sortu nahi du ospakizunak prestatzeko eta gertaera historiko hura gogora ekarriko duten ekitaldi edota jarduerak diseinatzeko.
Gaia jorratzeko, Udalak bilera irekia deitu du astelehenerako, urriaren 16rako. 19:30ean izango da Elkargunean (Oteiza aretoan).
Olivier Latry, Notre-Dameko katedraleko organista titularraren kontzertua
Olivier Latry organista frantziar ospetsuak Parisko Notre-Dame katedraleko Cavaille-Coll organo handiaren ordez Azkoitikoa joko du larunbat honetan. 23 urte besterik ez zituela, munduko katedral bisitatuenetariko organo-jotzaile titularra izendatu zuten, eta 2012tik Montrealgo Orkestra Nazionaleko organista emeritua da.
Establezimenduetan euskararen erabilera handitzeko dirulaguntzak urriaren 31 arte eska daitezke
Urtero legez, merkataritzako eta ostalaritzako establezimenduetan euskararen erabilera handitzeko dirulaguntzak emango ditu Udalak, Euskara sailaren eskutik. Dirulaguntzez gain, laguntza teknikoa ere eskaintzen da, lanerako diren testu laburrak itzuliz edo zuzenduz.
Eskaerak egiteko azken eguna urriaren 31 izango da, eta eskaerak ondorengo loturaren bidez egin daitezke: https://azkoitia.eus/udala/tramiteak eta baita aurrez aurre udaletxeko Herritarren Arreta Zerbitzuan ere.
Gaur hasi da gripearen aurkako txertaketa kanpaina Elkargunean
Gaur hasi da COVID-19aren eta gripearen aurkako txertaketa Elkargunean. Herritarrei gauzak erraztearren, anbulategiko arduradunek Elkargunea erabiltzea proposatu zien Udalari, eta ondorioz, gaurtik azaroaren 10era bitartean, 10:00etatik 17:00etara bertan jarriko dituzte txertoak.
COVID-19aren edota gripearen aurkako txertoa hartu nahi dutenek anbulatoriora deitu beharko dute hitzordua hartzeko, 943 00 76 10 telefonora, hain zuzen.
Domusa Teknik ISB eta Juaristi ISB, irrikaz eta gogotsu denboraldi berriari heltzeko
Domusa Teknik ISB eta Juaristi ISB taldeak indartsu eta gogotsu agertu dira denboraldi berriaren ateetan. Loiolan aurkeztu dituzte emakumezkoen eta gizonezkoen lehen bi taldeak eta argazki ofiziala atera dute arduradunekin eta entrenatzaileekin batera. Bertan izan dira Ana Azkoitia alkatea eta Igor Isusquiza Kirol zinegotzia taldeei babesa erakusteko asmoz, Azpeitiko udal ordezkariekin eta Gipuzkoako Foru Aldundiko Kirol diputatuarekin batera.
Seguru, ohi bezala, kirol ikuskizun apartak eskainiko dizkigutela kantxan. Benetan harro Iraurgi Saskibaloi Taldeaz!
Aizkibel Liburutegiak hilabetero eskainiko ditu ekintzak 5 eta 12 urte bitarteko haurrentzat
Aizkibel Udal Liburutegiak haurrei zuzendutako eskaintza zabalduko du ikasturte honetan. Urrian, hilabete honetan hasi eta maiatzera bitartean hilabetero ekintza ezberdinak izango dira.
Besteak beste, ipuin kontaketa saioak, zientzia tailerrak, idazketa lantegiak, itzal-argien taillerak, e.a. eskainiko dira, haurrek gozatuz, entretenituz, ikasi dezaten.
Ekintzak 5 eta 12 urte bitarteko haurrei zuzenduta daude, aldiro jakinaraziko dira jarduera bakoitzaren datak eta orduak.
Ordenantza berriek %2ko eguneraketa aurreikusten dute zerga eta tasa gehienetan
Eguzki plakak eta kargagailu elektrikoak jartzeagatik hobariak egingo dira, eta etxe hutsei errekargua jarriko zaie zenbait salbuespenekin.
Datorren urteko ordenantza fiskalei hasierako onespena eman zitzaien atzo arratsaldean egindako udal osoaren ezohiko bilkuran. Erabakirik gehientsuenetan onespena egon da EAJ/PNV, EH Bildu eta Azkoitia Bai-ren aldetik. PSE-EE guztietan abstenitu egin da, taxi tarifen onespenean ezik. Hasierako onespenarekin hasten da ordenantzen tramitazioa. 30 eguneko jendaurreko erakusketa fasea amaitutakoan sartuko dira indarrean, betiere helegiterik ez bada aurkezten.
Xabier Obeso artistak erakusketa inauguratuko du bihar Portaleburun
Ibilbide luzeko margolaria da, nazioko eta nazioarteko erakusketa askorekin. Kritikak errealismo garaikidearen artistarik adierazgarrienetakotzat jotzen du, eta filosofikotzat, transzendentaltzat eta sinbolikotzat jo du bere lana. Filosofikoa, gizakiaren hazteko premiarekin zerikusia duten gai sakonei buruzko gogoetak islatzen dituelako. Transzendentala, ezagutzen denaren mugak gainditzen dituelako, inkontzientean sakonduz. Sinbolikoa, sinboloen hizkuntzaren bidez adierazten delako.
Artista honek Azkoitian bisita egingo digu urriaren 6tik 15era eta artearen bidez filosofiaren mundu liluragarria barneratzeko aukera emango digu. Ibilbide luze horretan metatutako ezagutza guztia transmititzeko eta partekatzeko asmoz, artearen adin eta ezagutza-maila guztietako publikoari zuzendutako hitzaldi-solasaldi moduko topaketak antolatzea atsegin du, arteak gizakiaren garapenean duen eraginaz hitz egiteko, eta arteak garapen integral baterako berebiziko garrantzia zergatik duen azaltzeko.